பிரபாஸ் நடிப்பில் ‘ரிபெல்’ என்ற தெலுங்கு படத்தின் வேலைகளை ஜரூராகத் தொடங்கிவிட்டார் ராகவா. இந்தப் படத்தின் ஹீரோயின் யார் என்பதில்தான் அவருக்கு இப்போது சிக்கல். காஞ்சனாவை போலவே இந்தப் படத்திற்கும் அனுஷ்காவைத்தான் அவர் முதலில் முடிவு செய்திருந்ததாகக் கூறப்படுகிறது. ஏனெனில் காஞ்சனாவில் முதலில் அனுஷ்காதான் நடிப்பதாக இருந்தது. ஆனால் சில கருத்து வேறுபாடுகளால் தொடக்கத்திலேயே அவர் கழண்டுகொண்டார். பின்புதான் அவரது இடத்தில் லக்ஷ்மிராயை நடிக்க வைத்தார் லாரன்ஸ்.
தற்போது காஞ்சனாவின் வெற்றி லக்ஷ்மியின் இத்தனை வருட திரைப்பயணத்தில் ஒரு திருப்புமுனையையே ஏற்படுத்தி இருக்கிறது. அனுஷ்கா மீதான அந்த வருத்தத்தில்தான் காஞ்சனாவின் போஸ்டர்களில் அருந்ததியை மிஞ்சிய வெற்றி என்ற வார்த்தைகளை அதிகம் பயன்படுத்தினார்போல லாரன்ஸ்!
தற்போது ரிபெல் படத்தில் தமன்னாவை நாயகியாக்க முடிவு செய்துள்ளாராம் ராகவா. அதற்கான பேச்சுவார்த்தைகளும் சுமூகமாகவே போய்க்கொண்டிருக்கிறதாம். தமன்னாவுக்கு தமிழில் மார்க்கெட் ஆட்டம் கண்டிருந்தாலும் தெலுங்கில் நன்றாகவே இருக்கிறது. கார்த்தியின் பையா, ஆவாரா என்ற பெயரில் அங்கே ஹிட் அடித்ததும், அல்லு அர்ஜுனுடன் நடித்த பத்ரிநாத் நன்றாகப் போனதும் தமன்னா மார்கெட்டை தெலுங்கில் தூக்கி நிறுத்தியிருக்கிறது. காஞ்சனா வெற்றியால் ராகவாவின் ரிபெலில் தமன்னாவும் நடிக்க ரொம்பவே ஆர்வமாக இருக்கிறாராம்!
Post a Comment