வெங்காயம் மறு ரிலீஸ் ஏன்

Monday, 26 March 2012 17:02 | Posted by Tamil

சங்ககிரி ராச்குமார் இயக்கத்தில் சத்யராஜ், வெற்றி, பவீனா, எஸ்.எம்.மாணிக்கம் நடித்த படம், 'வெங்காயம்'. சில மாதங்களுக்கு முன் ரிலீசான இப்படத்தை இயக்குனரும், நடிகருமான சேரன் மறு ரிலீஸ் செய்துள்ளார். இதுகுறித்து அவர் கூறியதாவது: 'அன்னக்கிளி', 'ஒருதலை ராகம்', 'சித்திரம் பேசுதடி' ஆகிய படங்கள், ரிலீசானபோது சரியான வரவேற்பு பெறவில்லை. ஆனால், மறுரிலீஸ் செய்தபோது அப்படங்களின் மகத்துவம் தெரிந்து, ரசிகர்கள்  கொண்டாடினார்கள்.

அப்படங்கள்தான் தமிழ் சினிமாவின் டிரெண்ட் செட்டராகவும் மாறின. அதுபோல், சில மாதங்களுக்கு முன் ரிலீசான 'வெங்காயம்' படம் பற்றி கேள்விப்பட்டு பார்த்தேன். புதுமுக இயக்குனர் ராச்குமார், அற்புதமான படத்தை கொடுத்திருந்தார். சமூகத்துக்கு தேவையான நல்ல கருத்துகளை தைரியமாகச் சொல்லியிருந்தார். இன்றைய தலைமுறையினருக்கு தேவையான மெசேஜ் சொல்லும் படமாக, இது உருவாகியிருந்தது. இதுபோன்ற கருத்துகள் மக்களிடம் சேர வேண்டும். மேலும், இயக்குனர் ராச்குமாரின் உழைப்புக்கு ரசிகர்கள் அங்கீகாரம் கொடுக்க வேண்டும் என்று நினைத்து மதுரை தவிர தமிழகம் முழுவதும் 52-க்கும் மேற்பட்ட தியேட்டர்களில் ரிலீஸ் செய்துள்ளேன். இப்படத்துக்கு நல்ல வரவேற்பு கிடைத்துள்ளது.

இப்படத்தை பார்த்து ரசித்து வியந்த பல இயக்குனர்கள், தங்கள் கருத்துகளை வீடியோவில் பதிவு செய்து கொடுத்தனர். அதுவும் இப்படத்துக்கு உற்சாக டானிக்காக அமைந்துள்ளது. அவர்களுக்கும் இந்த வெற்றியில் பங்கு உண்டு. நல்ல படங்களை இதுபோல் தொடர்ந்து ரிலீஸ் செய்ய தயாராக இருக்கிறேன்.