அமிதாப் பிறந்த நாள் விழாவில் குடும்பத்துடன் பங்கேற்கிறார் ரஜினி!

Monday, 8 October 2012 10:47 | Posted by Tamil

சென்னை: பாலிவுட்டின் சாதனை நடிகர் அமிதாப் பச்சனின் 70வது பிறந்த நாள் விழாவில் குடும்பத்துடன் பங்கேற்கிறார் சூப்பர் ஸ்டார் ரஜினிகாந்த்.

இந்திய சினிமாவின் 'ஐகான்' என்று புகழப்படுபவர், தன் சினிமா உலக குரு என சூப்பர் ஸ்டார் ரஜினியால் அழைக்கப்படுபவர் அமிதாப் பச்சன்.

வரும் அக்டோபர் 11-ம் தேதி அவருக்கு 70 வது பிறந்த நாள். இந்த பிறந்தநாளை மிகவும் பிரம்மாண்டமாக கொண்டாட திட்டமிட்டுள்ளார் அவரது மனைவியும் நடிகையும் பாராளுமன்ற எம்.பியுமான திருமதி ஜெயாபச்சன்.

மும்மை பிலிம் சிட்டியில் மிகப் பிரமாண்டமாக நடைபெறவிருக்கிறது இந்த விழா. பாலிவுட், கோலிவுட் மற்றும் இந்திய சினிமா உலகைச் சேர்ந்த முக்கிய பிரமுகர்கள் அனைவருக்குமே விழாவுக்கு அழைப்பு விடுத்துள்ளனர்.

குறிப்பாக இந்த விழாவில் சூப்பர் ஸ்டார் ரஜினிகாந்த் கலந்து கொள்வது உறுதியாகியுள்ளது. அவர் தன் குடும்பத்தினருடன் பங்கேற்கவிருக்கிறார்.

இரவு 8.30 மணிக்கு பிறந்த நாள் விழா தொடங்குகிறது. அனில் அம்பானி உள்பட ஆயிரத்துக்கும் மேற்பட்ட சிறப்பு விருந்தினர்கள் பங்கேற்க ஆட்டம், பாட்டம், விருந்து என பெரும் விழாவாக நடக்கவிருக்கிறது.