தரமணி... இதுதான் ராம் இயக்கும் மூன்றாவது படத்தின் தலைப்பு என்பதை ஏற்கெனவே தெரிவித்திருந்தோம்.
இந்தப் படத்தின் தலைப்பே, படம் எதைப் பற்றியது என்பதை தெளிவாக்கிவிடும். ஆம்... மீண்டும் ஒரு முறை காதல், மோதல், செக்ஸ் போன்றவற்றில் சிக்கி அல்லாடும் ஐடி துறை இளைஞனை மையப்படுத்தி கதை அமைத்திருக்கிறார் ராம்.
இந்தப் படத்தின் ஹீரோவாக வசந்த் ரவி நடிக்கிறார். ஆன்ட்ரியா நாயகியாக நடிக்கிறார்.
இப்படத்தை ஜே.எஸ்.கே. பிலிம்ஸ் கார்ப்பரேஷன் நிறுவனம் தயாரிக்கிறது. தங்க மீன்கள் பட வெளியீட்டாளர் இந்த ஜேஎஸ்கேதான் என்பது குறிப்பிடத்தக்கது.
இப்படத்திற்காக ஒரு பாடல் காட்சியை இயக்குனர் ராம் படமாக்கிவிட்டார். வரும் 2014-ஆம் ஆண்டு ஜனவரியில் படத்தை வெளியிட திட்டமிட்டுள்ளனர். இப்படத்தில் பர்ஸ்ட் லுக் போஸ்டர் சமீபத்தில் வெளியிடப்பட்டது.
இப்படம் குறித்து இயக்குனர் ராம் கூறுகையில், "ஒரு கமர்ஷியல் பொழுதுபோக்குப் படம் இது. உலகமயமாக்கலின் நடைபெறும் ஒரு நகர்ப்புறக் காதல் கதையாக இப்படத்தை சித்தரித்துள்ளேன். மோதல், செக்ஸ், காமம் மற்றும் பொருளாதார பிரச்சினைகளின் இடையே ஆண், பெண் இருவருக்கும் இடையே ஏற்படும் நிரந்தரமான காதல் குறித்து இதில் சொல்லவிருக்கிறேன். ஐடி துறை சார்ந்த கதை மாந்தர்கள் இதில் உண்டுதான்.
இப்படத்தின் நாயகியாக நடித்து வரும் ஆண்ட்ரியாவின் திறமைகள் திரைத்துறையில் குறைவாக பயன்படுத்தப்பட்டிருக்கிறது. இந்த படம் ஆண்ட்ரியாவின் திறமையை வெளிப்படுத்தும் விதமாக அமையும்," என்றார்.
Post a Comment