டெல்லி: மாதவன் நடித்து வரும் தனு வெட்ஸ் மனு 2 இந்தி படத்தில் தனுஷ் கௌரவ தோற்றத்தில் வருகிறாராம்.
மாதவன், கங்கனா ரனௌத் நடித்த இந்தி படம் தனு வெட்ஸ் மனு. இந்த படத்தின் இரண்டாம் பாகத்தை தனுஷை வைத்து ராஞ்ஹனா படத்தை எடுத்த ஆனந்த் எல் ராய் எடுத்து வருகிறார். இரண்டாம் பாகத்திற்காக மாதவன் தாடி, மீசை, நீள முடியை துறந்து கிளீனாக ஷேவ் செய்து அலைபாயுதே படத்தில் வந்தது போன்று இளமையாகிவிட்டார்.
படத்தில் கங்கனா இரட்டை வேடத்தில் நடிக்கிறார். இந்த படத்தில் தனுஷ் கௌரவத் தோற்றத்தில் வருகிறாராம். படப்பிடிப்பு தற்போது டெல்லியில் நடந்து வருகிறது. இந்நிலையில் ஆனந்த் எல் ராய்க்கு இன்ப அதிர்ச்சி கொடுக்க தனுஷ் கோவாவில் இருந்து விமானம் மூலம் டெல்லி சென்றார். அங்கு அவர் தனு வெட்ஸ் மனு படப்பிடிப்பில் ஒரு நாள் முழுக்க இருந்தார்.
இது குறித்து தனுஷ் ட்விட்டரில் கூறியிருப்பதாவது,
டெல்லியில் தனு வெட்ஸ் மனு 2 படப்பிடிப்பில் உள்ளேன். எனக்கு மிகவும் பிடித்த இயக்குனரான ஆனந்த் எல். ராயுடன் உள்ளேன். அவரது இயக்கத்தில் நடிப்பதை மிஸ் பண்ணுகிறேன் என்று தெரிவித்துள்ளார்.
தனுஷ் ஆனந்துக்கு இன்ப அதிர்ச்சி கொடுக்கவே டெல்லி வந்தார். அவர் படத்தில் கௌரவத் தோற்றத்தில் வருகிறாரா என்பதை தற்போதே தெரிவிக்க முடியாது என திரைக்கதை ஆசிரியர் ஹிமான்ஷு சர்மா தெரிவித்துள்ளார்.
படப்பிடிப்பில் தனுஷும், மாதவனும் நட்பாக பேசிப் பழகினார்களாம்.
Post a Comment