காட்சிகள் மாற்றியமைக்கப்பட்ட பிறகு வஜ்ரம் படத்துக்கு யு சான்று அளித்துள்ளனர் தணிக்கைக் குழுவினர்.
பசங்க, கோலிசோடா ஆகிய வெற்றிப்படங்களில் நடித்த ஸ்ரீராம், கிஷோர், பாண்டி, குட்டி மணி ஆகிய நால்வரும் தற்போது நடித்து வரும் படம் ‘வஜ்ரம்'.
இப்படத்தில் கதாநாயகியாக பவானி ரெட்டி என்ற புதுமுகம் அறிமுகமாகிறார். மற்றும் ஜெயபிரகாஷ், தம்பி ராமையா, மயில்சாமி உள்ளிட்ட பலர் நடிக்கிறார்கள்.
பைசல் இசையமைக்கும் இப்படத்திற்கு குமரேசன் ஒளிப்பதிவு செய்கிறார். கதை, திரைக்கதை அமைத்து எஸ்.டி.ரமேஷ் செல்வன் இயக்கியிருக்கிறார். ஸ்ரீ சாய்ராம் பிலிம் பேக்டரி பட நிறுவனம் சார்பாக பி.ராமு தயாரித்திருக்கிறார்.
இப்படத்தின் படப்பிடிப்பு முடிந்து கடந்த மாதமே தணிக்கை குழுவிற்கு அனுப்பப்பட்டது. படத்தைப் பார்த்த தணிக்கை குழுவினர், படத்தில் வன்முறை காட்சிகள் அதிகம் இருப்பதாக கூறி யுஏ சான்றிதழ்தான் தர முடியும் என்று கறாராகக் கூறிவிட்டனர்.
படத்திற்கு யு சான்றிதழ் பெற வேண்டும் என்பதில் கவனமாக இருந்த படக் குழு, சில காட்சிகளை நீக்கி விட்டு, அதற்கு பதிலாக வேறு காட்சிகளைப் படமாக்கி இணைத்து சென்சாருக்கு அனுப்பினர்.
இந்தக் காட்சிகளை அனுமதித்த தணிக்கை குழுவினர், படத்திற்கு யு சான்றிதழ் வழங்கியுள்ளது.
இம்மாதம் 27ம் தேதி வஜ்ரம் வெளியாகிறது.
Post a Comment