பழம்பெரும் நடிகர் எம்.ஆர்.ராதாவின் கொள்ளுப்பேரன் பிரபாகரன் ஹரிகரன் ஹாலிவுட் படம் ஒன்றை தயாரிக்க இருப்பதாக தகவல்கள் வெளியாகியுள்ளன.
பிரபாகரன் ஹரிகரன் மறைந்த நடிகர் எம்.ஆர்.ஆர். வாசுவின் பேரனாவார். இவர் அமெரிக்காவில் வசித்து வருகிறார். அங்குள்ள ஹாலிவுட் ஸ்டூடியோவில் சினிமா கற்றிருக்கும் அவர் பிரபல ஹாலிவுட் தயாரிப்பு நிறுவனங்களுடன் இணைந்து படம் தயாரிக்க உள்ளார்.
இதுபற்றி பேசிய பிரபாகரன் ஹரிகரன், நான் ஹரிகேன் ஸ்டூடியோ என்ற தயாரிப்பு நிறுவனத்தை நடத்தி வருகிறேன். சினிமா பரம்பரையில் இருந்து வந்ததால் என்னிடம் சினிமா ரத்தத்திலேயே ஊறி இருக்கிறது. சர்வதேச அளவில் படம் தயாரிக்க வேண்டும் என்பதே எனது நோக்கம் என்று கூறியுள்ளார்.
ஹாலிவுட் படங்களை தயாரிக்க இருக்கிறேன். முதல் கட்டமாக பிரமென் டவுன் மியூசிசியன் என்ற நாவலை அடிப்படையாக வைத்து ஒரு அனிமேசன் மியூசிக்ல் சினிமா எடுக்க இருக்கிறோம். இது 45 மில்லியன் டாலர் பட்ஜெட்டில் எடுக்கப்படுகிறது.
இசை சம்பந்தமான படம் என்பதால் உலக புகழ்பெற்ற இசை அமைப்பாளர் இசை அமைக்க பேச்சு நடந்து வருகிறது.
இதுதவிர வோல்பெல் என்ற அனிமேஷன் படத்தை தயாரிக்க இருக்கிறோம். இதில் இந்திய நட்சத்திரங்கள் நடிக்க உள்ளனர். இரு படங்களும் உலக அளவில் பேசப்படுகிற படமாக இருக்கும். என்கிறார் பிரபாகரன்.
ஹாலிவுட் பட உலகில் பெரிய தாத்தா எம்.ஆர்.ராதாவின் பெயரை பதிவு செய்வார் பிரபாகரன் ஹரிகரன்.
