சென்னை: ஆர்யா - நயன்தாரா நடிப்பில் உருவாகியுள்ள ராஜா ராணி படத்தின் இசை வரும் ஆகஸ்ட் 23-ம் தேதி சென்னையில் பிரமாண்டமாக வெளியாகிறது.
ஆர்யா நடித்த படங்களிலேயே அதிகபட்ச விளம்பரம் - அதுவும் நயன்தாராவுடன் திருமணம் என்கிற ரேஞ்சுக்கு விளம்பரம் செய்யப்பட்ட படம் ராஜா ராணி.
ஷங்கரின் உதவி இயக்குநராக இருந்த அட்லீ இயக்கியுள்ள இந்தப் படத்தின் ட்ரைலர் சமீபத்தில் வெளியானது.
ஏஆர் முருகதாஸின் ஏஆர்எம் புரொடக்ஷன்ஸ் நிறுவனமும், பாக்ஸ் ஸ்டார் நிறுவனமும் இணைந்து தயாரிக்கும் படம் இது.
புதுமாப்பிள்ளை ஜிவி பிரகாஷ்குமார் இசையமைத்துள்ளார்.
இந்த ஆண்டு பெரிய பட்ஜெட், முக்கிய இயக்குநர்கள் நடித்த படங்களுக்கு ஜிவி பிரகாஷ்குமார்தான் இசையமைத்தார். இயக்குநர்கள் பாரதிராஜா, பாலா படங்களும் இதில் அடக்கம். விஜய் நடித்த தலைவாவுக்கும் ஜிவிதான் இசை.
இந்தப் படங்கள் மற்றும் அவற்றின் இசை பெரிதாக பேசப்படவில்லை. இந்த நிலையில் ராஜா ராணி படத்தின் இசை ஆகஸ்ட் 23-ம் தேதி வெளியாகிறது.
பாடல்கள் இந்தப் படத்தின் பலமாக அமைந்துள்ளதாக தயாரிப்பாளர் ஏஆர் முருகதாஸ் பாராட்டியுள்ளது குறிப்பிடத்தக்கது.
Post a Comment